టిజిఎస్పి సిబ్బంది ఎస్డిఆర్ఎఫ్ ప్రదర్శనను పర్యవేక్షించిన డిజిపి జితేందర్

తెలంగాణ రాష్ట్ర స్పెషల్ పోలీస్ (టి జి ఎస్ పి) సిబ్బందితో  ఏర్పాటైన స్టేట్ డిజాస్టర్ రెస్పాన్స్ ఫోర్స్ (ఎస్ డి ఆర్ ఎఫ్) ప్రదర్శనను  డైరెక్టర్ జనరల్ ఆఫ్ పోలీస్ డాక్టర్ జితేందర్  హుస్సేన్ సాగర్ ప్రాంతంలో శుక్రవారం నాడు పర్యవేక్షించారు. వరదలు సంభవించినప్పుడు ప్రజలను కాపాడేందుకు తెలంగాణ రాష్ట్ర స్పెషల్ పోలీస్ లోని అన్ని బెటాలియన్ల సిబ్బందితో ఎస్ డి ఆర్ ఎఫ్  బృందాన్ని ఏర్పాటు చేశారు. గత డిసెంబర్ నెలలో జరిగిన ప్రజాపాలన విజయోత్సవ వేడుకల సందర్భంగా రాష్ట్ర విపత్తు ప్రతిస్పందన దళం (SDRF) ను ముఖ్యమంత్రి ప్రారంభించారు.
1వ బెటాలియన్ యూసుఫ్‌గూడ, 2వ బేటాలియన్ ఆదిలాబాద్, 3వ బెటాలియన్ ఇబ్రహీంపట్నం, 4వ బెటాలియన్ వరంగల్, 5వ బెటాలియన్ ములుగు, 6వ బెటాలియన్ కొత్తగూడెం, 7వ బెటాలియన్ నిజామాబాద్, 8వ బెటాలియన్ కొండాపూర్, 10వ బెటాలియన్ బీచ్‌పల్లి, 12వ బెటాలియన్  నల్గొండ, 13వ బెటాలియన్ మంచిర్యాల, 17వ బెటాలియన్ సిరిసిల్ల సిబ్బందితో ఎస్ డి ఆర్ ఎఫ్ బృందాలను ఏర్పాటు చేశారు. వీరికి నేషనల్ డిజాస్టర్ రెస్పాన్స్ ఫోర్స్ (NDRF) సిబ్బందితో శిక్షణ ఇప్పించారు.
కటక్ (ఒడిశా), ఆర్కోణం (తమిళనాడు) వడోదర  (గుజరాత్), పూణే (మహారాష్ట్ర), విజయవాడ (AP) లోని NDRF కేంద్రాలలో రెండు నెలల శిక్షణ పొందారు. 
శిక్షణ పొందిన టీజీఎస్పీ సిబ్బంది హుస్సేన్ సాగర్ లోని బోట్ క్లబ్ వద్ద  ప్రదర్శన ఇచ్చారు. బాధితులు నీళ్లలో మునిగిపోయినప్పుడు, ఆపదలో చెప్పుకున్నప్పుడు వారిని రక్షించే ప్రయత్నాలను ప్రదర్శన ద్వారా చూపించారు.  ఈ కార్యక్రమంలో శాంతి భద్రతల అడిషనల్ డిజిపి మహేష్ ఎం భగవత్,  టిజిఎస్పి అడిషనల్ డీజీపీ  సంజయ్ కుమార్ జైన్, యూసఫ్ గూడ బెటాలియన్ కమాండెంట్  మురళీకృష్ణ తదితరులు కార్యక్రమంలో పాల్గొన్నారు.