ఏప్రిల్ నెలలో ముగ్గురి అవతార పురుషుల జయంతులు

TPN.... C.N.MURTHY
P.GANNAVARAM
APL...4

• ఏప్రియల్ 5 న బాబు జగ్జీవన్  రాం
• ఏప్రియల్ 11 న మహాత్మా జ్యోతిరావు పూలే
• ఏప్రియల్ 14 న డా.బి.ఆర్.అంబేద్కర్

భగవంతుడు తాను నిర్వర్తించవలసిన కొన్ని విధులను కొంతమంది అవతార మూర్తులను భూలోకానికి పంపి వారి ద్వారా నెరవేరుస్తుంటాడు . వాళ్లనే మనం సంఘ సంస్కర్తలని కూడా పిలుచు కొంటాం. అటువంటి కోవలోకే వస్తారు ఇప్పుడు మనం తెలుసుకోబోయే ముగ్గురు అవతారమూర్తులు. ముఖ్యంగా ఆ ముగ్గురు మూర్తులూ ఏప్రియల్ నెలలోనే జన్మించడం విశేషం . వారు లేకున్నా వారి ఆశయాలను, సిద్ధాంతాలను నెరవేర్చేందుకు ప్రభుత్వాలు కృషి చేస్తున్నాయి.
ఏప్రియల్ 5 న  భారత ఉప ప్రధాని బాబు జగ్జీవన్ రాం,ఏప్రియల్ 11న,గొప్ప సామాజికవేత్త, మహాత్మా జ్యోతిరావు పూలే,ఏప్రియల్ 14 న ,భారత రాజ్యాంగ నిర్మాత డా.బి.ఆర్.అంబేద్కర్ ల జయంతి లు జరగడం ఎంతో విశేషం.ఈ ముగ్గురూ సామాజిక రుగ్మతలను పారద్రోలడంతో పాటు ముఖ్యంగా మహిళాభివృద్ధికి కృషి చేశారని పేర్కొనవచ్చు .

 మహాత్మా జ్యోతిరావు ఫూలే ...

కుల వ్యవస్థ నిర్మూలనతోపాట అంటరానితనం , మహిళా సంక్షేమం . కోసం అవిరళ కృషి చేసిన మహనీయుడు మహాత్మా జ్యోతిరావు పూలే . అణగారిన కులాల ప్రజలు సమాన హక్కులు పొందటానికి " సత్య శోధక్ సమాజ్ " ను ఏర్పాటు చేశాడు . 1827 ఏప్రియల్ 11 న మహారాష్ట్ర లోని సతారా జిల్లాలోని బి.సి సామాజిక వర్గానికి చెందిన " మాలి " కుటుంబానికి చెందిన అప్పటి సామాజిక వేత్త , ఉద్యమకారుడు గోవిందరావు పూలే దంపతులకు జన్మించారు . పీష్వాల కాలంలో వారి కుటుంబం పూల వ్యాపారం చేయడం వల్ల వారి కుటుంబీకుల ఇంటిపేరు పూలే గా మారింది . సామాజిక  సంస్కరణలలో భాగంగా భారతదేశం లో మహిళా విద్యకు మార్గదర్శకుడయ్యాడు. . ఇందుకు పూలే భార్య సావిత్రి బాయి పూలే కూడా ఎంతగానో సహకారం అందించింది.తొలి మహిళా ఉపాధ్యాయురాలిగా పేరుగాంచింది . 1848 లో బాలికల కోసం ప్రత్యేకంగా ఒక పాఠశాలను స్థాపించారు . పూలే చిన్నతనం నుండే చదువుతో పాటు సమాజంలో జరుగుతున్న వివిధ సామాజిక రుగ్మతల పట్ల దృష్టి సారించారు . కొన్ని కారణాల వల్ల చదువు మానివేయడంతో , అతనికి చదువుపై గల ఆసక్తిని గమనించిన ఒక ముస్లిం ఉపాధ్యాయుడు , క్రైస్తవ పెద్ద కలిసి పూణే లో నిర్వహిస్తున్న స్టాటిష్ మిషన్ పాఠశాల లో చేర్పించారు . విద్యార్థి దశ  నుండే పూలేకు శివాజీ అంటే ఎంతో ఇష్టం . శివాజీతో పాటు వాషింగ్టన్ జీవిత చరిత్రలు ఎక్కువగా ప్రభావితం చేయడం వల్ల దేశ భక్తి తో పాటు నాయకత్వ లక్షణాలు అలవాటయ్యాయి . థామస్ రచించిన " మానవ హక్కులు " పుస్తకం పూలే ఆలోచనలను ప్రభావితం చేసింది . ఆ రోజులలో ఎక్కువగా బాల్య వివాహాలు జరగటం , ముక్కుపచ్చలారని బాలికలకు ముదుసరుల తో ముడిపెట్టడం , తో వారు చిన్నతనంలోనే వితంతువులు కావటం వారి జీవితాలు దుర్భరంగా మారటాన్ని గమనించిన పూలే వితంతు పునర్వివాహాల గురించి ప్రజలలో చైతన్యం తీసుకొచ్చారు . 1877 లో సత్య సమాజం తరఫున " దీనబంధు " వార పత్రిక ప్రారంభించాడు . సమాజంలో అణగారిన వెనుకబడిన వర్గాల కు చెందిన మహిళల అభ్యున్నతి కోసం కృషి చేసినందుకు పూలేకు మహాత్మా బిరుదు లభించింది . సమ సమాజ స్థాపన కోసం పరి తపించిన మహాత్మా పూలే 1890 నవంబర్ 28 న మరణించారు .

డా.బి.ఆర్.అంబేద్కర్...

ప్రపంచ మేధావి, భారత రాజ్యంగ నిర్మాత , పత్రికాధిపతి ,దేశ మొదటి న్యాయ శాఖామంత్రి, ప్రముఖ సంఘ సంస్కర్త డా.బి.ఆర్.అంబేద్కర్ గురించిఎవరికీ చెప్పవలసిన అవసరం లేదు . విద్యార్థుల స్థాయి నుండి వృద్ధుల వరకు అంబేద్కర్ పేరు సుపరిచితమే . 1891 ఏప్రియల్ 14 న మెహర్ కులానికి చెందిన రాంజీ మలోజీ సాక్పాల్ , భీమా బాయి దంపతులకు 14 వ సంతానంగా అంబేద్కర్ జన్మించారు . తండ్రి భారత సైన్యంలో సుబేదారుగా పనిచేశారు . దురదృష్టవశాత్తు అంబేడ్కర్ తన 6 వ ఏటనే తల్లి భీమబాయి ని పోగొట్టుకున్నారు . పాఠశాల స్థాయి నుండి అంబేద్కర్ కుల వివక్షను ఎదుర్కొన్నారు . అప్పటికే సామాజిక సమస్యలపై పోరాడుతున్న మహాత్మా జ్యోతిరావు పూలేను తన గురువుగా పేర్కొని , ఆయన బాటలోపయనిస్తూ , అన్ని రకాల సామాజిక సమస్యలను ఎదుర్కొని 1912 లో బి .ఎలో ఉత్తీర్ణుడయ్యాడు . 1915 లో ఎం.ఎ. 1916 లో పి.హెచ్.డి పట్టా పొందారు . అంబేద్కర్ తన  32 వ ఏట బార్ ఎట్ లా ను, కొలంబియా విశ్వ విద్యాలయం నుండి, డి.ఎస్.సి పట్టాను లండన్ విశ్వ విద్యాలయం నుండి  పొందారు . 1927 లో " బహిష్కృత భారత్ " అనే మరాఠీ పక్ష పత్రికను ప్రారంభించారు . 1930 , 1931,1932 సంవత్సరాలలో బ్రిటిష్ ప్రభుత్వం నిర్వహించిన 3 రౌండ్ టేబుల్స్ సమావేశాల్లో దళితులకు ప్రత్యేక నియోజక వర్గాలివ్వాలని పట్టుబట్టారు . 1932 లో రామ్స్ మెక్ డోనాల్డ్ కమ్యూనల్ అవార్డును అంబేద్కర్ కు ప్రకటిచడంతో , దళితులకు ప్రత్యేక నియోజక వర్గాల కోసం ప్రతిపాదనలు జరిగాయి . గాంధీజీ " హరిజన సేవక్ సమాజ్ " ఏర్పాటు చేసి అస్పృశ్యతా నివారణ కోసం కృషి చేస్తూ , దానిలో అంబేద్కర్ ను భాగస్వామిని చేశారు . దేశ మొదటి న్యాయ శాఖామంత్రి గా,రాజ్యాంగ పరిషత్ సభ్యునిగా అంబేద్కర్ కఠోర శ్రమకోర్చి వివిధ దేశాల రాజ్యాంగాలను క్షుణ్ణంగా  అధ్యయనం చేసి ప్రధానంగా 8 దేశాల రాజ్యాంగాలలో ఉన్న మంచి మంచి విషయాలను పొందుపర్చి మన దేశానికి అనువుగా ఉండే రాజ్యాంగాన్ని రచించారు .రాజ్యాంగ రచనా సమయంలో నియమితులైన ఇతర  ఏడుగురు  సభ్యులు వివిధ కారణాల వల్ల వైతొలగటంతో , మొత్తం రాజ్యాంగ రచన భారమంతా అంబేద్కర్ భుజాలపై పడింది . ఎన్నో సమస్యలు ఎదురైనా 2 సంవత్సరాల 11 నెలల 18 రోజులు కష్టపడి స్వదస్తూరీ తో రాజ్యాంగాన్ని లిఖించిన ఘనత అంబేద్కర్ కు దక్కింది . దేశంలో అన్ని రంగాలలో ఎంతో పేరు  ప్రఖ్యాతులు సంపాదించిన అంబేద్కర్ 1956 డిసెంబర్ 6 న తుదిశ్వాస విడిచారు . ఆయన సేవలను గుర్తించిన కేంద్ర ప్రభుత్వం ఆయన మరణాంతరం భారత రత్న అవార్డును ప్రధానం చేసింది .

 బాబూ జగ్జీవన్ రాం ....

బాబూజీ గా ప్రసిద్ధిగాంచిన జగ్జీవన్ రాం ఎంతో పేరొందిన స్వాతంత్య్ర సమర యోధుడు , సుదీర్ఘ పార్లమెంటేరియన్ , అంతకు మించి గొప్ప సంఘ సంస్కర్త . 1908 ఏప్రియల్ 5 న బీహార్ లోని భోజ్ పూర్ జిల్లా చంద్వా గ్రామంలో చమర్ కులానికి చెందిన సాఖీరాం , వాసంతీ దేవి దంపతులకు జన్మించారు . 1914 లో ప్రాధమిక విద్య నభ్యసించారు . 1920 లో మాధ్యమిక విద్యను , 1922 లో అర్రా టౌన్ పాఠశాల లో చదివారు . అక్కడ కుల వివక్షను ఎదుర్కొన్నారు . 1925 లో పాఠశాలలో ఏర్పాటు చేసిన మంచినీటి కుండల వ్యవహారం జగ్జీవన్ రాం జీవితాన్నే మార్చేసాయి . కాశీ లో ఉన్న బెనారస్ హిందూ విశ్వవిద్యాలయ వ్యవస్థాపకుడు పండిట్ మదన్ మోహన్ మాలవ్య జగ్జీవన్ రాం చదువుతున్న పాఠశాలను సందర్శించినప్పుడు తన ప్రసంగంతో మదన్ మోహన మాలవ్యనే ఆకట్టుకొన్నాడు . ప్రసంగానికి ముగ్ధుడైన మాలవ్య జగ్జీవన్ రాం ను విశ్వవిద్యాలయం లో చేరాలని ఆహ్వానించారు . 1927 లో మెట్రిక్యులేషన్ ప్రధమ డిజిజన్ లో పాసై విశ్వవిద్యాలయం లో చేరారు . అక్కడ కూడా కుల వివక్ష నెలకొనడంతో కలకత్తా విశ్వవిద్యాలయం లో చేరారు . 1935 లో అఖిల భారత అణగారిన వర్గాల కూటమి స్థాపనకు సహకరించారు . 1940 లో ప్రారంభమైన సత్యాగ్రహం , క్విట్ ఇండియా ఉద్యమాలలో చురుకుగా పాల్గొన్నారు . భారత రాజ్యాంగ పరిషత్ లో దళితుల హక్కుల కోసం వాదించారు . రాజకీయంగా నెహ్రూ ప్రభుత్వం లో పిన్న వయస్సు కలిగిన మంత్రిగా పేరుగాంచి అంచెలంచెలుగా ఎదిగి వివిధ శాఖలను సమర్ధవంతంగా నిర్వహించి భారత ఉప ప్రధానిగా బాధ్యతలు చేపట్టారు . సుమారు 40 సంవత్సరాలు పార్లమెంట్ సభ్యునిగా కొనసాగిన బాబూజీ 1986 జులై 6 న కన్నుమూశారు .

ఆ మహనీయులను అనునిత్యం తలచుకొంటూ వారి ఆశయ సాధనకు కృషి చేస్తూ, వారు కన్న కలలను నిజం చేద్దాం .