అమెరికా కన్నా బెటర్ రోడ్లు మనవయ్యేలా చేస్తా: నితిన్‌ గడ్కరీ

మన దేశంలో హైవేలను అమెరికా రోడ్ల కంటే అందంగా తీర్చిదిద్దుతానని కేంద్ర రోడ్డు రవాణా రహదారుల శాఖ మంత్రి నితిన్ గడ్కరీ పేర్కొన్నారు. అమెరికా రిచ్ కంట్రీ కాబట్టి అక్కడ రోడ్లు బావుండటంలో పెద్ద విశేషం లేదు. అక్కడి రోడ్లు బావుండటం వల్ల అది రిచ్ కంట్రీ అయ్యిందని జాన్ఎఫ్ కెన్నడీ అన్నట్లుగా నితిన్ గడ్కరీ చెప్పారు. రానున్న రెండేళ్ల కాలంలో భారత్ లో అన్నీ హైవేలు అమెరికా కన్నా అద్భుతంగా ఉంటాయని అన్నారు. కేవలం మాటలు మాత్రమే కాదని, వాటిని నెరవేర్చుతానని అన్నారు. కేంద్రంలో భారతీయ జనతా పార్టీ అధికారంలోకి వచ్చిన తర్వాత జాతీయ రహదారుల బాధ్యతను తనకు అప్పగించారని ఆయన అన్నారు. 

గత 11 ఏళ్లలో భారత్ వ్యాప్తంగా అనేక రోడ్లు, ఫ్లైఓవర్లు వంతెనలు సక్సెస్ ఫుల్ గా నిర్మించామని అన్నారు. గత ప్రభుత్వ పాలనలో భారతదేశ రోడ్లపై గుంతలే ఎక్కువగా ఉంటాయని విదేశీయులు పలు కామెంట్స్ చేసేవారని మంత్రి అన్నారు. తాము అధికారంలోకి వచ్చినప్పటి నుంచి రహదారులను అందంగా తీర్చిదిద్దడానికి అభివృద్ధి చర్యలు చేపడుతున్నామన్నారు. రాబోయే రోజుల్లో.. రోడ్డు కనెక్టివిటీ పరంగా భారత్‌ ప్రపంచంలోనే అత్యుత్తమ దేశంగా మారుతుందని పేర్కొన్నారు. అంతేకాకుండా నీరు, విద్యుత్, రవాణా, కమ్యూనికేషన్ ఉన్నచోట పరిశ్రమలు, వ్యాపారాలు పెరుగుతాయని అన్నారు.