తిరుపతి, జూన్ 9:
అప్పలాయగుంటలోని శ్రీ ప్రసన్న వేంకటేశ్వర స్వామివారి బ్రహ్మోత్సవాల్లో భాగంగా సోమవారం ఉదయం స్వామివారు సింహ వాహనంపై యోగ నారాయణ స్వామి అలంకారంలో భక్తులకు దివ్యదర్శనమిచ్చారు.
ఉదయం 8 గంటలకు ప్రారంభమైన వాహనసేవ అట్టహాసంగా సాగింది. స్వామివారిని దర్శించుకునేందుకు భారీగా తరలివచ్చిన భక్తులు కర్పూరహారతులు సమర్పిస్తూ, నామస్మరణలతో ఆలయ ప్రాంగణాన్ని మార్మోగించారు. యోగ ముద్రలో పద్మాసన స్థితిలో దర్శనమిచ్చిన స్వామి దర్శనంతో భక్తులు పరవశించిపోయారు.
సాయంత్రం 5 గంటలకు ఊంజల్ మండపంలోకి స్వామివారి వేంచేపు జరుగుతుంది. అనంతరం సాయంత్రం 5.30 నుంచి 6.30 గంటల వరకు ఊంజల్ సేవ నిర్వహించనున్నారు. రాత్రి 7 గంటలకు ముత్యపు పందిరి వాహనంపై స్వామివారు మరోమారు భక్తులకు దర్శనమివ్వనున్నారు.
ఈ వాహనసేవలో డిప్యూటీ ఈవో శ్రీ హరీంద్రనాథ్, ఏఈవో శ్రీ దేవరాజులు, సూపరింటెండెంట్ శ్రీమతి శ్రీవాణి, టెంపుల్ ఇన్‌స్పెక్టర్ శ్రీ శివకుమార్, అర్చకసిబ్బంది, శ్రీవారి సేవకులు, భక్తులు పెద్ద సంఖ్యలో పాల్గొన్నారు.
శ్రీవారి దర్శనం భక్తుల హృదయాలను ఆనందపరిచింది. ఆలయ ప్రాంగణమంతా భక్తిశ్రద్ధలతో నిండిపోయింది.
.jpeg)
