చంద్రబాబు ముస్లింల ద్రోహి...

MAHESH, MANDAPETA, TPN

వక్ఫ్  బోర్డు చట్టానికి మద్దతు పలికిన టిడిపి అధినేత చంద్రబాబు చరిత్రలో ముస్లిం ద్రోహి గా నిలిచిపోతారని షేక్ అండ్ షేక్  కార్పొరేషన్ మాజీ డైరెక్టర్ షేక్ అలీ ఖాన్ బాబా విమర్శించారు. గురువారం మండపేటలో మీడియాతో ఆయన మాట్లాడారు. లోక్ సభ లో వక్ఫ్ బిల్లు ఆమోదంపై నిరసన తెలిపారు. వక్ఫ్ బోర్డులో ఇతరులకు అవకాశం ఎలా కల్పిస్తారని ప్రశ్నించారు. బిల్లుకు మద్దతు ఇవ్వడం ద్వారా  చంద్ర బాబు ముస్లిం ద్రోహిగా చరిత్రలో మిగిలిపోతారని విమర్శించారు. టిడిపిలోని మైనార్టీలు పునరాలోచించు కోవాలని విజ్ఞప్తి చేశారు. లేదంటే వారిని ముస్లింలు వెలివేస్తారని హెచ్చరించారు. వైయస్ రాజశేఖర్ రెడ్డి ముఖ్యమంత్రిగా ఉన్న సమయంలో పేద  ముస్లింల కోసం రిజర్వేషన్లు తీసుకొచ్చారని గుర్తు చేశారు. వైయస్ జగన్మోహన్ రెడ్డి ముఖ్యమంత్రిగా ఉన్నప్పుడు మైనార్టీలకు పెద్దపీట వేశారని కొనియాడారు. మైనార్టీల సంక్షేమానికి రు 26 వేల కోట్లు ఖర్చు చేసిన ఘనత జగన్ దే అని పేర్కొన్నారు. ఎన్నో సంక్షేమ కార్యక్రమాలు జగన్ ముస్లిం ల కోసం తీసుకొచ్చారని పేర్కొన్నారు. జాయింట్ పార్లమెంటరీ కమిటీ లో  సవరణ బిల్లులు తమ పార్టీ వ్యతిరేకించిందన్నారు.  కేంద్రంలోని ఎన్డీఏ ప్రభుత్వం పార్లమెంట్లో ఆమోదించిన వక్ఫ్ బిల్లు రాజ్యాంగ వ్యతిరేకమని పేర్కొన్నారు. రాజ్యాంగంలోని ఆర్టికల్ 14, 15 ,25 ,26  స్ఫూర్తికి వక్ఫ్ సవరణ బిల్లు తూట్లు పడుతుందన్నారు. ప్రజాస్వామ్య సెక్యులర్ దేశంలో ముస్లింలను ద్వితీయ పౌరులు స్థాయికి దిగజార్చేందుకు ఎన్డీఏ ప్రయత్నిస్తుందని విమర్శించారు .1954 నుంచి అమలులోకి వచ్చిన వక్ఫ్ చట్టానికి గతంలో జరిగిన సవరణలకు నేటి సవరణలకు చాలా వ్యత్యాసం ఉందన్నారు. గత ప్రభుత్వాలు ముస్లిం మత పెద్దలతో చర్చించాకే సవరణలు చేసిన సంఘటనలు గుర్తు చేశారు. మసీదులు దర్గాలు ఆశురాఖనాలు స్మశానాల నిర్వహణ కోసం ముస్లిం లు భూమిలను దానంగా ఇచ్చారని తెలిపారు. అవి అల్లాకు సంబంధించిన ఆస్తులుగా తాము భావిస్తామన్నారు. నేటి ఎన్డీఏ ప్రభుత్వం దాని అర్ధాన్ని మార్చేస్తుందన్నారు. వక్ఫ్ ఆస్తులకు సంబంధించిన ఆధార పత్రాలు చూపమంటే ఎవరు చూపగలరని ప్రశ్నించారు. ఎవరు  వక్ఫ్  చేయాలన్న వారు ఐదేళ్లు ముస్లిం గా ప్రాక్టీస్ చేసి ఉండాలని ఇందుకు సంబంధించిన డిక్లరేషన్ కోరడం ఏమిటనీ ఆయన మండిపడ్డారు. ముస్లింలు ఎన్డీఏ భాగస్వామ్య పక్షాలకు తగిన సమయంలో తగిన గుణపాఠం నేర్పుతాయని హెచ్చరించారు.