ఏపీ వ్యాప్తంగా కొనసాగుతున్న మున్సిపల్ ఎన్నికల పోలింగ్‌లో అధికారులు చేసిన చిన్నపాటి నిర్లక్ష్యం పెద్ద ఎత్తున గందరగోళానికి దారి తీసింది. విజయవాడ కార్పొరేషన్ పరిధిలోని 55వ డివిజన్‌లో ప్రింటింగ్ సిబ్బంది చేసిన మిస్టేక్ వల్ల ఉద్రిక్త పరిస్థితులు చోటుచేసుకున్నాయి.
బ్యాలెట్ పేపర్‌లో కాంగ్రెస్ కేండిడేట్ పేరు పక్కన వైసీపీ గుర్తును, వైసీపీ కేండిడేట్ పేరు పక్కన కాంగ్రెస్ హస్తం గుర్తును ప్రింట్ చేశారు. ఓటింగ్ మొదలైన కాసేపట్లోనే ఈ విషయాన్ని గమనించిన కేండిడేట్స్, ఏజెంట్లు తీవ్ర నిరసన తెలపడంతో అధికారులు హుటాహుటిన అక్కడ జరుగుతున్న పోలింగ్‌ను నిలిపివేశారు.
తర్వాత కొత్త బ్యాలెట్ పేపర్లను అత్యంత వేగంగా సిద్ధం చేసి గంట ఆలస్యంగా తిరిగి ఓటింగ్‌ను ప్రారంభించారు. పోలింగ్‌కు ఉదయం ఎంత సమయం బ్రేక్ పడిందో అంతే సమయాన్ని సాయంత్రం పూట అదనంగా కేటాయిస్తామని అధికారులు హామీ ఇచ్చారు. అయితే ఈ తారుమారుపై వైసీపీ నాయకులు సంచలన అనుమానాలు వ్యక్తం చేయగా, కేవలం ప్రింటింగ్ పొరపాటుపై రాజకీయం చేయొద్దని టీడీపీ నేతలు చెప్పారు
అలాగే ఇదే విధంగా తిరుపతి జిల్లా వెంకటగిరి మున్సిపాలిటీలో కూడా ఎన్నికల అధికారుల నిర్లక్ష్యం బయటపడింది. వెంకటగిరి 35వ వార్డులోని పోలింగ్ బూత్ బయట ఓటర్ల అవేర్‌నెస్ కోసం ఏర్పాటు చేసిన డిస్‌ప్లే పేపర్‌లో తెలుగుదేశం పార్టీ (TDP)కేండిడేట్ పేరు ఎదురుగా వైసీపీ ఫ్యాన్ గుర్తును ముద్రించడం వివాదాస్పదమైంది.
కాకపోతే పోలింగ్ ప్రారంభం కాకముందే స్థానిక నేతలు ఈ విషయాన్ని ముందుగానే గుర్తించి అధికారుల దృష్టికి తీసుకెళ్లడంతో వారు వెంటనే స్పందించి ఆ పేపర్‌ను మార్చేసి తప్పు దిద్దుకున్నారు. ప్రస్తుతం అక్కడ ఎలాంటి అంతరాయం లేకుండా ప్రశాంతమైన వాతావరణంలోనే ఓటింగ్ కొనసాగుతోంది.
ఆంధ్రప్రదేశ్ రాష్ట్రవ్యాప్తంగా ఎలక్షన్ నిర్వహణలో ఎలాంటి ముద్రణా లోపాలు, టెక్నికల్ పొరపాట్లు మళ్లీ రిపీట్ కాకుండా ఎన్నికల సిబ్బంది చాలా అప్రమత్తంగా వ్యవహరించాలి అని రాష్ట్ర ఎన్నికల సంఘం ఉన్నతాధికారులు ఆదేశాలను జారీ చేశారు.