యువత భవితకు భరోసా కార్యక్రమంలో ఎంపి, ఎమ్మెల్యే
చిత్తూరు, సెప్టెంబర్ 28: కేంద్రం, రాష్ట్రంలో ఎన్డిఏ ప్రభుత్వం యువత భవిష్యత్తుకు భరోసా కల్పిస్తోందని, విద్యార్థులు ఎలాంటి ప్రలోభాలకు లోనుకాకుండా ఉన్నత చదువులపై దృష్టి సారించాలని చిత్తూరు పార్లమెంట్ సభ్యులు దగ్గుమల్ల ప్రసాదరావు సూచించారు. రాష్ట్ర ప్రభుత్వం ప్రతిష్టాత్మకంగా చేపట్టిన ‘యువత భవితకు భరోసా’ కార్యక్రమం సోమవారం చిత్తూరులోని అపోలో యూనివర్సిటీలో ఘనంగా నిర్వహించారు. ఈ కార్యక్రమానికి చిత్తూరు ఎమ్మెల్యే గురజాల జగన్మోహన్తో కలిసి ఎంపీ హాజరయ్యారు.
ఈ సందర్భంగా ఎంపీ దగ్గుమల్ల ప్రసాదరావు మాట్లాడుతూ.. విద్యార్థుల్లో భవిష్యత్పై నమ్మకం పెంపొందించడం, ప్రభుత్వ పథకాలపై అవగాహన కల్పించడం లక్ష్యంగా ఈ కార్యక్రమాన్ని నిర్వహిస్తున్నట్లు తెలిపారు. రాజ్యాంగబద్ధంగా వ్యవస్థలను సమర్థవంతంగా నడిపిస్తూ పారదర్శక పాలన అందిస్తున్నామని చెప్పారు. ఎలాంటి అపోహలకు తావులేకుండా నిజాయితీతో ప్రభుత్వ పరిపాలన కొనసాగుతోందని పేర్కొన్నారు. యువతకు ఉపాధి అవకాశాలు పెంచేందుకు రాష్ట్ర ప్రభుత్వం అనేక చర్యలు చేపడుతోందని, నైపుణ్యాభివృద్ధి కార్యక్రమాలు విస్తృతంగా అమలు చేస్తున్నట్లు వివరించారు. యువత తమ సామర్థ్యాలను మెరుగుపరుచుకుని భవిష్యత్తును స్వయంగా నిర్మించుకోవాలని పిలుపునిచ్చారు.
ఎమ్మెల్యే గురజాల జగన్మోహన్ మాట్లాడుతూ.. విద్యార్థులు ప్రభుత్వ పథకాల ద్వారా లభించే అవకాశాలను సద్వినియోగం చేసుకుని ఉన్నత స్థానాలను అధిరోహించాలని సూచించారు. పరిశ్రమలతో పాటు విద్యాసంస్థలు కూడా ప్రాంతీయ అభివృద్ధికి కీలకంగా మారుతున్నాయని తెలిపారు. అపోలో యూనివర్సిటీ స్థాపనతో మురకంబట్టు ప్రాంతం అభివృద్ధి చెందిందని, ఇది విద్యా రంగ ప్రాధాన్యతకు నిదర్శనమని పేర్కొన్నారు. అపోలో యూనివర్సిటీ అత్యున్నత ప్రమాణాలతో విద్యను అందిస్తూ విద్యార్థుల భవిష్యత్తును తీర్చిదిద్దుతోందని, భవిష్యత్తులో డీమ్డ్ యూనివర్సిటీగా ఎదగడానికి ప్రభుత్వం సంపూర్ణ సహకారం అందిస్తుందని వెల్లడించారు.
ఈ కార్యక్రమంలో వైస్ ఛాన్సలర్ ప్రొఫెసర్ డా. నితిన్ ఎం. నాగార్కర్, ప్రో వైస్ ఛాన్సలర్ (అకాడెమిక్స్) డా. అల్ఫ్రెడ్ జే. ఆగస్టిన్, రిజిస్ట్రార్ అనిల్ కుమార్ ఎస్, ఏఐఎంఎస్ఆర్ డీన్ డా. రామ్య రామకృష్ణన్, యూనిట్ హెడ్ ఎస్. బాలరాజ్తో పాటు రాజకీయ ప్రముఖులు, వివిధ విభాగాల డీన్లు, ప్రిన్సిపల్స్, అధ్యాపకులు, సిబ్బంది, విద్యార్థులు పెద్ద సంఖ్యలో పాల్గొన్నారు.