ఏపీ రాజకీయాల్లోనే కాకుండా వైఎస్ కుటుంబంలో కూడా కలకలం రేపుతున్న బెంగళూరులోని యలహంక ప్యాలెస్ ఆస్తి వివాదం మరోసారి పీక్స్కు చేరింది. ఏపీ కాంగ్రెస్ కమిటీ అధ్యక్షురాలు వైఎస్ షర్మిల హఠాత్తుగా బెంగళూరులో ల్యాండ్ అవ్వడంతో అక్కడ వాతావరణం ఒక్కసారిగా వేడెక్కింది. కోర్టు ఆదేశాల ప్రకారం ప్యాలెస్ ప్రాంగణంలోకి షర్మిల ప్రవేశించకుండా అడ్డుకోవడానికి స్థానిక పోలీసులు భారీ భద్రతా బలగాలు పెద్ద ఎత్తున మోహరించడం రెండు తెలుగు రాష్ట్రాల పొలిటికల్ వర్గాల్లో తీవ్ర ఆసక్తిని రేకెత్తిస్తోంది.
యలహంక ప్యాలెస్ ఆస్తి తగాదాకు సంబంధించి వైఎస్ జగన్ మోహన్ రెడ్డి ప్రతినిధిగా భీమిశెట్టి రమేష్ బాబు కోర్టులో పిటిషన్ దాఖలు చేశారు. 2007లోనే వైఎస్ భారతి తల్లి సుగుణమ్మ ఈ ప్యాలెస్ను తమ కంపెనీకి 20 ఏళ్ల పాటు లీజుకు ఇచ్చారని కోర్టుకు తెలిపారు. అక్కడ తోటల పెంపకం, లగ్జరీ గెస్ట్ హౌస్ల నిర్మాణంతో పాటు ఆస్తి ఆధునీకీకరణ కోసం తాము కోట్ల రూపాయలు వెచ్చించామని వివరించారు.
అయితే 2026 ఆగస్టు 27న సుగుణమ్మ ఈ ఆస్తి మొత్తాన్ని తన కుమార్తె భారతి, మనుమరాళ్ల పేరుతో గిఫ్ట్ డీడ్ చేశారని అన్నారు. ఈ క్రమంలో బయటి వ్యక్తులు లేదా అలంకరణ పనుల పేరుతో ఇతరులెవరైనా ప్యాలెస్లోకి వస్తే ఆస్తికి తీవ్ర నష్టం వాటిల్లుతుందని అభ్యంతరం వ్యక్తం చేశారు.
రెండు వర్గాల సుదీర్ఘ వాదనలను పరిశీలించిన బెంగళూరు న్యాయస్థానం.. విచారణ తేలేవరకు కూడా షర్మిల గానీ, ఆమె తరఫున వచ్చిన వ్యక్తులెవరైనా కానీ యలహంక ప్యాలెస్లోకి ప్రవేశించకూడదంటూ స్పష్టమైన ఆంక్షలు విధిస్తూ విచారణను డిసెంబర్ 19వ తారీఖుకు వాయిదా వేసింది.
అయితే ఇలా ఒకవైపు కోర్టు ఆదేశాలు అమల్లో ఉండగానే, మరోవైపు షర్మిల డైరెక్టుగా బెంగళూరుకే రావడం.. ఆమె ప్యాలెస్ వైపు కనుక వెళ్తే పోలీసులు ఎలాంటి చర్యలు తీసుకుంటారనే అంశంపై ఉత్కంఠ నెలకొంది. ఈ యలహంక ప్యాలెస్ వివాదం ముందు ముందు ఇంకెన్ని రాజకీయ, న్యాయపరమైన మలుపులు తిరుగుతుందో చూడాలి.
