తెలుగు డిజిటల్ ఎంటర్‌టైన్‌మెంట్‌లో తనదైన స్టైల్‌తో ఊపేసిన టాక్ షో అన్‌స్టాపబుల్ విత్ ఎన్‌బీకే అని తెలిసిందే. హోస్ట్‌గా నందమూరి బాలకృష్ణ పవర్, బోల్డ్ క్వశ్చన్స్, సరదా మ్యానరిజమ్స్ ఈ ఈవెంట్‌ను ఓటీటీలోనే బిగ్గెస్ట్ ట్రెండ్ సెట్టర్‌గా నిలబెట్టాయి. ఇప్పటికే నాలుగు సక్సెస్‌ఫుల్ సీజన్లను పూర్తి చేసుకున్న ఈ టాక్ షో.. ఇప్పుడు ఐదో సీజన్‌తో మరింత లార్జర్ దేన్ లైఫ్ కాన్సెప్ట్‌తో గ్రాండ్‌గా కమ్‌బ్యాక్ ఇవ్వడానికి సిద్ధం అవుతోంది. సీజన్ 5 ఓపెనింగ్ ఎపిసోడ్‌కే టాలీవుడ్‌లో నెవర్ బిఫోర్ అనేలా సెన్సేషన్ కాంబినేషన్‌ను వేదికపైకి తీసుకురాబోతున్నారనే వార్త వైరల్ అవుతోంది.
నాలుగు దశాబ్దాలుగా తెలుగు చిత్రసీమను ఏలుతున్న ఇద్దరు టాప్‌హీరోలు మెగాస్టార్ చిరంజీవి, నందమూరి నటసింహం బాలకృష్ణ మధ్య… వృత్తిపరంగా తీవ్రమైన పోటీ ఉన్నా కూడా, వ్యక్తిగతంగా ఒకరిపై ఒకరు ఎంతో గౌరవం, ప్రేమ ప్రదర్శించుకుంటూ ఉంటారు. అలాంటి వీరిద్దరూ ఐదో సీజన్ ఫస్ట్ ఎపిసోడ్ ద్వారా ఒకే టాక్ షో వేదికపైకి రాబోతున్నారనే టాక్ సినీ వర్గాల్లో జోరుగా ప్రచారం జరుగుతోంది. ఆహా నిర్వాహకులు చిరంజీవిని ఫస్ట్ గెస్ట్‌గా ఆహ్వానించడానికి గట్టి ప్రయత్నాలే చేస్తున్నారట. ఇదే కనుక నిజమైతే ఓటీటీ రికార్డులు అన్నీ తుడిచిపెట్టుకుపోవడం ఖాయం.
ఈ వేదికపై బాలయ్య తుంటరి ప్రశ్నలకు, చిరంజీవి తనదైన చమత్కారంతో జవాబులిస్తే ఆ ఎపిసోడ్ ఇచ్చే కిక్కే వేరుగా ఉంటుంది. తమ సుదీర్ఘ సినీ ప్రస్థానంలో ఎన్నో మధుర జ్ఞాపకాలను, కెరీర్‌లో ఎదుర్కొన్న సవాళ్లను, పర్సనల్ లైఫ్‌లోని ఫన్నీ ఇన్సిడెంట్స్‌ను, పొలిటికల్ ఎక్స్‌పీరియన్సెస్ వంటి అనేక ఆసక్తికర విషయాలపై వీరి మధ్య సుదీర్ఘ చర్చ జరిగే ఛాన్స్ ఉంటుంది. గతంలో పవన్ కల్యాణ్, మహేశ్ బాబు, ప్రభాస్, అల్లు అర్జున్, రవితేజ వంటి స్టార్లంతా వచ్చి అలరించినా..చిరంజీవి ఎంట్రీ ఇచ్చే ఎపిసోడ్ మాత్రం హిస్టరీలోనే పీక్స్‌లో నిలిచిపోతుంది. అయితే ఈ వార్తలపై ‘ఆహా’ టీమ్ గానీ, షో మేకర్స్ గానీ ఇంకా అఫీషియల్‌ ప్రకటన చేయలేదు.