ఏపీ వ్యాప్తంగా వెలువడిన స్థానిక సంస్థల ఎన్నికల ఫలితాల్లో అధికార టీడీపీ,జనసేన, బీజేపీ కూటమి తమ తిరుగులేని జనాదరణను చాటుకుంది. ఉత్తరాంధ్ర మెయిన్ సిటీ విశాఖపట్నం నుంచి దక్షిణాన ఉన్న తిరుపతి వరకు మెజారిటీ కార్పొరేషన్లు, మున్సిపాలిటీలను కూటమి తన అకౌంట్‌లో వేసుకుని విజయకేతనాన్ని ఎగురవేసింది.
వైసీపీ అధినేత వైఎస్ జగన్ మోహన్ రెడ్డి సొంత ఇలాగా అయిన కడప జిల్లా పులివెందుల మున్సిపాలిటీలో కూటమి హిస్టారికల్ విజయాన్ని నమోదు చేసింది. టీడీపీ ఛైర్‌పర్సన్ అభ్యర్థి గీతాకుమారి ఏకంగా 13వేల875 ఓట్ల అపారమైన మెజార్టీతో గెలుపొంది సరికొత్త హిస్టరీని క్రియేట్ చేశారు. ముందస్తు ఏకగ్రీవాలతో కలుపుకుని మొత్తం 37 వార్డులలో.. కూటమి ఏకంగా 34 స్థానాలను సొంతం చేసుకుని పులివెందుల కోటను కైవసం చేసుకోగా, వైసీపీ కేవలం 3 వార్డులకే పరిమితమై భంగపడింది.
ఉప ముఖ్యమంత్రి పవన్ కళ్యాణ్ సొంత నియోజకవర్గమైన పిఠాపురంలో జనసేన పార్టీ ఘనవిజయాన్ని సాధించింది. మున్సిపల్ ఛైర్మన్‌గా దానం లాజర్ బాబు 8,944 ఓట్ల భారీ మెజార్టీతో గెలుపొందారు. కాకినాడ జిల్లా గొల్లప్రోలు మున్సిపాలిటీ పరిధిలో కూడా జనసేన స్పష్టమైన ఆధిపత్యాన్ని ప్రదర్శించి మున్సిపల్ పీఠాన్ని దక్కించుకోగా..ఇక్కడ వైసీపీ ఒక్క వార్డు కూడా గెలవలేకపోయింది.
తిరుపతి కార్పొరేషన్‌లో మొత్తం 66 స్థానాలలో తెలుగు దేశం పార్టీ 38, జనసేన 19, భారతీయ జనతా పార్టీ 3 స్థానాలను గెలుచుకుని ..తిరుపతి మేయర్ పీఠాన్ని కైవసం చేసుకున్నాయి. చిత్తూరు కార్పొరేషన్‌లోనూ తెలుగు దేశం పార్టీ ఏకంగా 51 డివిజన్లు గెలిచి కఠారి హేమలత మేయర్‌గా విజయాన్ని సాధించారు. విశాఖ జీవీఎంసీ ఫలితాల్లో కూడా కూటమి అభ్యర్థి 1.19 లక్షల ఓట్ల కంటే ఎక్కువ భారీ ఆధిక్యంతో మేయర్ పీఠం వైపు దూసుకెళ్తున్నారు.
రాష్ట్రమంతటా ప్రతికూల పవనాలు ఉన్నా కూడా నంద్యాల జిల్లా నందికొట్కూరు మున్సిపాలిటీలో మాత్రం వైసీపీ తన సత్తా చాటింది. మొత్తం 32 వార్డుల్లో 23 స్థానాలు గెలుచుకుని పీఠాన్ని దక్కించుకోడం ఆ పార్టీకి పెద్ద ఊరటగా నిలుస్తోంది.
మరోవైపు జీవీఎంసీలో వైసీపీ తరఫున పోటీ చేసిన తండ్రీకూతుళ్లు పోతిన హనుమంతరావు, ఆయన కుమార్తె జాహ్నవి తమ వార్డుల్లో గెలుపొంది ప్రత్యేక ఆకర్షణగా నిలిచారు. అలాగే ధర్మవరం మున్సిపాలిటీ 1వ వార్డులో తీవ్ర ఉత్కంఠ మధ్య వైసీపీ అభ్యర్థి చెలిమి రామకృష్ణమ్మ తన ప్రత్యర్థిపై కేవలం ఒకే ఒక్క ఓటు ఆధిక్యంతోనే గెలుపొందారు. టీడీపీ రిక్వెస్ట్‌తో రీకౌంటింగ్ నిర్వహించినా అదే ఫలితం రావడంతో ఆమె విజయం ఖరారైంది.