కేరళలోని ప్రసిద్ధ శబరిమల అయ్యప్ప స్వామి ఆలయం వార్షిక మండల-మకరవిళక్కు యాత్ర సీజన్ సందర్భంగా నవంబర్ 16న సాయంత్రం 5 గంటలకు తెరుచుకోనుంది. నవంబర్ 17 నుంచి మండల యాత్ర అధికారికంగా ప్రారంభం కానుంది. ఈ యాత్రకు దేశంలోని వివిధ ప్రాంతాల నుంచి వేలాది మంది భక్తులు తరలివస్తారు.
ప్రస్తుత ప్రధాన అర్చకుడు ఈడీ ప్రసాద్ నంబూద్రి, తంత్రి కందరు బ్రహ్మదత్తన్ సమక్షంలో ఆలయాన్ని తెరవనున్నారు. అనంతరం కొత్త ప్రధాన అర్చకుడు అరెక్కర సుబ్రమణియన్ శంకరన్ నంబూద్రి నియామక కార్యక్రమం సాయంత్రం 6.30 గంటలకు నిర్వహించనున్నారు.
యాత్ర సీజన్లో భక్తుల రద్దీని నియంత్రించేందుకు ట్రావెన్కోర్ దేవస్థానం బోర్డు ప్రత్యేక ఏర్పాట్లు చేస్తోంది. రోజుకు గరిష్ఠంగా 80 వేల మంది భక్తులకు దర్శనం కల్పించనున్నారు. భక్తులందరికీ ఆన్లైన్ బుకింగ్ తప్పనిసరి చేశారు.
శబరిమల దర్శనానికి వెళ్లాలనుకునే భక్తులు ముందుగానే అధికారిక వర్చువల్ క్యూ విధానంలో స్లాట్ బుక్ చేసుకోవాలి. భక్తుల రాకపోకలు సజావుగా సాగేందుకు, భద్రతను పర్యవేక్షించేందుకు ప్రత్యేక చర్యలు తీసుకుంటున్నారు.
మండల యాత్ర శబరిమలలో జరిగే అత్యంత ముఖ్యమైన వార్షిక ఆధ్యాత్మిక కార్యక్రమాల్లో ఒకటి. ఈ సందర్భంగా భక్తులు సంప్రదాయ నియమాలు పాటిస్తూ అయ్యప్ప స్వామిని దర్శించుకుంటారు.
