మహా విశాఖ నగర పాలక సంస్థ (జీవీఎంసీ) ఎలక్షన్ రిజల్ట్స్‌లో టీడీపీ, జనసేన, బీజేపీ కూటమి విజయదుందుభి మోగించిన విషయం తెలిసిందే . విశాఖ నగర మేయర్ పీఠాన్ని కూటమి సంపూర్ణంగా కైవసం చేసుకుంది. కూటమి తరఫున బరిలోకి దిగిన మేయర్ కేండిడేట్ ముక్కా శ్రావణి ఏకంగా 2.44 లక్షల ఓట్ల భారీ మెజార్టీతో ఘన విజయాన్ని సాధించారు. మొత్తం 120 వార్డులలో టీడీపీ 64, జనసేన 26, బీజేపీ 8 డివిజన్లలో విజయం సాధించడంతో కూటమి బలం 98కి చేరింది. మరోవైపు వైసీపీ కేవలం 13 స్థానాలకే పరిమితమవ్వగా, సీపీఎం ఒక స్థానంలో, ఇండిపెండెంట్లు 8 వార్డుల్లో విజయం సాధించారు.
అయితే ఈ ఎన్నికల రిజల్ట్ తర్వాత ఓ ఆసక్తికరమైన విషయం ఆలస్యంగా వెలుగులోకి వచ్చింది. టీమిండియా యువ ఆల్‌రౌండర్ నితీశ్ కుమార్ రెడ్డి పెదనాన్న అయిన కాకి గోవింద రెడ్డి ఈ ఎన్నికల్లో రెబల్ కేండిడేట్‌గా పోటీ చేయడమే కాకుండా.. కార్పొరేటర్‌గా గెలుపొందారు. నితీశ్ కుమార్ రెడ్డి తండ్రి ముత్యాల రెడ్డి, కాకి గోవింద రెడ్డి సొంత అన్నదమ్ములు. గాజువాక నియోజకవర్గం పరిధిలోని 86వ వార్డు నుంచి ఇండిపెండెంట్ అభ్యర్థిగా బరిలోకి దిగిన గోవింద రెడ్డి, 200 ఓట్లకు పైగా మెజార్టీతో వైసీపీ అభ్యర్థిపై విజయాన్ని సాధించారు.
సుమారు 35 ఏళ్ల సుదీర్ఘ రాజకీయ అనుభవమున్న కాకి గోవింద రెడ్డి టీడీపీలో సీనియర్ నాయకుడిగా ఎన్నో ఏళ్లుగా కొనసాగారు. పార్టీలో రాష్ట్ర ఆర్గనైజింగ్ సెక్రటరీగా, అధికార ప్రతినిధిగా, ఎంబీసీ కార్పొరేషన్ ఛైర్మన్‌గా కొన్ని కీలక పదవులను నిర్వహించడంతో పాటు 2021 ఎన్నికల్లోనూ కార్పొరేటర్‌గా గెలిచారు. ఈసారి కూడా 86వ వార్డు నుంచి టీడీపీ టికెట్ ఆశించినా కూడా ఆయనకు నిరాశే ఎదురైంది. దాంతో అసంతృప్తికి గురైన గోవింద రెడ్డి, పార్టీ నిర్ణయాన్ని ధిక్కరించి స్వతంత్ర అభ్యర్థిగా నామినేషన్‌ను వేశారు.
అభిమానుల ఒత్తిడితో తన భార్య శ్రీదేవిని 85వ వార్డు నుంచి ఇండిపెండెంట్ అభ్యర్థిగా బరిలోకి దింపినా కూడా ఆమె ఓడిపోయారు. కానీ గోవింద రెడ్డి మాత్రం 86వ వార్డులో గెలిచి తన రాజకీయ పట్టును నిరూపించుకున్నారు. అధికారికంగా పార్టీ టికెట్ నిరాకరించినా సరే, నియోజకవర్గంలో తనకున్న పలుకుబడి, మంచితనంతోనే ఆయన కార్పొరేటర్‌గా విజయం సాధించడం స్థానికంగా హాట్ టాపిక్‌గా మారింది.