ఏపీలో అత్యంత ఉత్కంఠ రేపిన స్థానిక సంస్థల ఎన్నికల ఓట్ల కౌంటింగ్ తుది ఘట్టానికి చేరుకుంటోంది. అక్కడక్కడా చిన్నపాటి ఘర్షణలు తప్ప ఆంధ్రప్రదేశ్ వ్యాప్తంగా కౌంటింగ్ ప్రక్రియ ప్రశాంత వాతావరణంలోనే కొనసాగుతోంది.
కాగా ఉదయం బ్యాలెట్ పెట్టెలు తెరిచిన నిమిషం నుంచే టీడీపీ, జనసేన, బీజేపీ కూటమి అభ్యర్థులు చాలా చోట్ల జయభేరి మోగిస్తూ తమ తిరుగులేని ఆధిపత్యాన్ని ప్రదర్శిస్తున్నారు. గతంతో పోలిస్తే ప్రధాన ప్రతిపక్షమైన వైసీపీ ఎఫెక్ట్ ఈ ఎన్నికల్లో పెద్దగా కనిపించలేదనే చెప్పాలి.
ముఖ్యంగా నగర పాలక సంస్థలైన కార్పొరేషన్లలో కూటమి అభ్యర్థుల గాలి స్పష్టంగా వీస్తోంది. మొత్తం 13 మున్సిపల్ కార్పొరేషన్లలో.. ఇప్పటి వరకు 10 చోట్ల లెక్కింపు ఫైనల్ స్టేజ్‌కు చేరగా, ఆ 10 కార్పొరేషన్లలోనూ కూటమి అభ్యర్థులే ఆధిక్యంలో దూసుకుపోతున్న సీన్లు కనిపిస్తున్నాయి. ఇక్కడ వైసీపీ గానీ, ఇతరుల హవా పెద్దగా కనిపించలేదు.
ఇక మున్సిపాలిటీల విషయం ఒకసారి చూస్తే మొత్తం 87 పురపాలక సంఘాల్లో 71 చోట్ల రౌండ్ల వారీ ట్రెండ్స్ స్పష్టమయ్యాయి. వీటిలో కూటమి కేండిడేట్స్ ఇప్పటికే 20 మున్సిపాలిటీలను కైవసం చేసుకుని గ్రాండ్ విక్టరీని సాధించగా, మరో 44 మున్సిపాలిటీల్లో తిరుగులేని లీడ్‌లో కొనసాగుతున్నారు. అంటే సుమారు 64 మున్సిపాలిటీలు టీడీపీతో కూడిన కూటమి ఖాతాలోకి వెళ్లడం ఖాయంగా కనిపిస్తోంది.
మరోవైపు వైసీపీ కేవలం 5 మున్సిపాలిటీలలో మాత్రమే తక్కువ ఆధిక్యంలో ఊపిరి పీల్చుకోగా, ఇండిపెండెంట్లు, ఇతరులు 3 చోట్ల ముందుకు సాగుతున్నారు. కౌంటింగ్ కేంద్రాల వద్ద తమకు అనుకూలంగా ఫలితాలు వెలువడుతుండటతో కూటమి వర్గాలు విజయోత్సవ సంబరాల్లో మునిగితేలుతున్నాయి.