ఆంధ్రప్రదేశ్ పాలిటిక్స్ మరోసారి ఎన్నికల హీట్‌తో వేడెక్కాయి. రాష్ట్రంలో వివిధ కారణాలతో వాయిదా పడుతూ వస్తున్న పట్టణ స్థానిక సంస్థల ఎన్నికల నిర్వహణకు రాష్ట్ర ఎన్నికల సంఘం (ఎస్‌ఈసీ) గ్రీన్ సిగ్నల్ ఇచ్చింది. దీనిపై రాష్ట్ర ఎన్నికల కమిషనర్ అనిల్ చంద్ర పునేఠా ఈరోజు అధికారిక ఎన్నికల షెడ్యూల్‌ను విడుదల చేశారు. నోటిఫికేషన్ వెలువడిన వెంటనే సంబంధిత పురపాలక ప్రాంతాల్లో ఎన్నికల ప్రవర్తనా నియమావళి (మోడల్ కోడ్ ఆఫ్ కండక్ట్) అమల్లోకి వచ్చినట్లు ప్రకటించారు.
ఎన్నికల షెడ్యూల్ వివరాలు
నామినేషన్ల స్వీకరణ: నవంబర్ 14 నుంచి 16 వరకు
నామినేషన్ల పరిశీలన: నవంబర్ 17
ఉపసంహరణకు గడువు: నవంబర్ 19
పోలింగ్ తేదీ: నవంబర్ 26 (ఉదయం 7:00 నుంచి సాయంత్రం 5:00 వరకు)
ఓట్ల లెక్కింపు & ఫలితాలు: నవంబర్ 30
గతంలో వార్డుల పునర్విభజనలో తలెత్తిన సమస్యలు, కొన్ని న్యాయపరమైన వివాదాలు , రిజర్వేషన్ల అంశాల కారణంగా 4 నగరపాలక సంస్థలతో పాటు 19 మున్సిపాలిటీలు, నగర పంచాయతీలకు ఎలక్షన్స్ నిలిచిపోయాయి. ఇటీవల హైకోర్టులో న్యాయపరమైన అడ్డంకులు తొలగిపోవడం, ప్రభుత్వం రిజర్వేషన్ల ప్రాసెస్‌ను పూర్తి చేయడంతో ఎస్‌ఈసీ ఈ నిర్ణయం తీసుకుంది.
ఈ ఎన్నికల ప్రాసెస్ ద్వారా శ్రీకాకుళం, కాకినాడ, రాజమండ్రి , మంగళగిరి-తాడేపల్లి కార్పొరేషన్లలోని 260 డివిజన్లతో పాటు, 19 మున్సిపాలిటీలు అలాగే నగర పంచాయతీల పరిధిలోని 749 వార్డులకు కొత్త ప్రజాప్రతినిధులు ఎన్నుకోబడతారు. ఎలక్షన్ కోడ్ అమల్లోకి రావడంతో ఆ పరిధుల్లో ఎలాంటి కొత్త సంక్షేమ పథకాలకు, అధికారిక ప్రకటనలకు ఆస్కారం ఉండదు. పెండింగ్ ఎన్నికలు కావడంతో అన్ని ప్రధాన రాజకీయ పార్టీలు ఈ పురపోరును సవాలుగా తీసుకుని సత్తా చాటడానికి సిద్ధమవుతున్నాయి.