ఏపీ పాలిటిక్స్లో కూటమి పార్టీల మధ్య సమన్వయం మరోసారి చర్చనీయాంశంగా మారింది. ముఖ్యంగా కడప జిల్లా పరిషత్ చైర్మన్ ఎంపిక వ్యవహారం బీజేపీ ఎమ్మెల్యే ఆదినారాయణరెడ్డికి తీవ్ర అసంతృప్తిని కలిగించినట్లు కనిపిస్తోంది. తన కుటుంబానికి చెందిన యువ నాయకుడికి పదవి దక్కుతుందని ఆశించిన ఆయనకు చివరి నిమిషంలో ఎదురైన పరిణామాలు ఆగ్రహాన్ని తెప్పించాయి. ఈ వ్యవహారంపై మీడియా ముందుకు వచ్చిన ఆయన చేసిన కామెంట్లు ఇప్పుడు రాజకీయ వర్గాల్లో ఆసక్తిని రేకెత్తిస్తున్నాయి.
జమ్మలమడుగు ఎమ్మెల్యే ఆదినారాయణరెడ్డి తన సోదరుడి కుమారుడు డాక్టర్ రాజేష్రెడ్డికి కడప జెడ్పీ చైర్మన్ పదవి ఇవ్వకపోవడంపై ఓపెన్గానే అసహనం వ్యక్తం చేశారు. పదవి కావాలని తాము మొదటినుంచి పట్టుబట్టలేదని, అయితే ఆ పదవి విషయంలో హామీ ఇచ్చిన తర్వాత డెసిషన్ ఎందుకు మారిందని ఆయన ప్రశ్నించారు. సెలక్షన్ ప్రక్రియ ఉదయం ఒక విధంగా, మధ్యాహ్నం మరోలా, రాత్రికి ఇంకోలా పరిణామాలు మారాయని సెటైర్ వేశారు.
చివరకు రాత్రి 11.30 గంటల సమయంలో జెడ్పీ చైర్మన్ పదవిని టీడీపీ కేండిడేట్కు కేటాయించినట్లు ప్రకటించడంపై ఆదినారాయణరెడ్డి అభ్యంతరం వ్యక్తం చేశారు. ఈ మొత్తం వ్యవహారం క్రికెట్లో సూపర్ ఓవర్ను తలపించిందని కామెంట్ చేయడం ద్వారా తన అసంతృప్తిని బహిరంగంగానే బయటపెట్టారు.
యూత్ను పాలిటిక్స్లో ప్రోత్సహించాలనే ఉద్దేశంతో తన సోదరుల కుమారులైన డాక్టర్ రాజేష్రెడ్డి, డాక్టర్ గోవర్ధన్రెడ్డిని రాజకీయాల్లోకి తీసుకొచ్చినట్లు ఆదినారాయణరెడ్డి చెప్పుకొచ్చారు. జెడ్పీ చైర్మన్ పోస్ట్ ఇస్తామన్న హామీ వల్ల రాజేష్రెడ్డి జెడ్పీటీసీ సభ్యుడిగా పోటీకి దిగారని పేర్కొన్నారు. ఇప్పుడు పదవి దక్కకపోవడంతో తన ఫ్యామిలీ మెంబర్స్ నిరుత్సాహానికి గురయ్యారని ..ఈ పరిస్థితుల్లో వారికి అండగా నిలవాల్సిన బాధ్యత తనపై ఉందని చెప్పారు.
ఈ పరిణామాల వెనుక ఏం జరిగిందో తెలుసుకుంటానని, ఎక్కడ తప్పు జరిగిందనే విషయాన్ని బయటపెడతానని ఆయన అన్నారు. కూటమి కోసం తాము నిబద్ధతతో పనిచేశామని, ముఖ్యంగా పులివెందులలో టీడీపీ విజయానికి తన వంతు పాత్ర పోషించానని గుర్తుచేశారు. అయినా కూడా తమకు ఇచ్చిన హామీ అమలుకాకపోవడం బాధాకరమని వ్యాఖ్యానించారు.
తనకు ప్రత్యామ్నాయ పదవి లేదా మంత్రి పదవి అవసరం లేదని ఆదినారాయణరెడ్డి క్లారిటీ ఇచ్చారు. టీడీపీ, బీజేపీ మధ్య సమన్వయ లోపమే ఈ పరిస్థితికి కారణమని అభిప్రాయపడ్డారు. సమస్యను పరిష్కరిస్తే బాగుంటుందని, లేదంటే తన రాజకీయ నిర్ణయాన్ని ప్రకటిస్తానని తెలిపారు. అవసరమైతే రిజైన్ అంశంపై కూడా వెనక్కి తగ్గేది లేదన్న సంకేతాలు ఇచ్చారు.
ఇదిలా ఉండగా, భారతీయ జనతా పార్టీకి తన పూర్తిస్థాయి మద్దతు ఉందని చెప్పిన ఆదినారాయణరెడ్డి.. పార్టీ పెద్దలు హస్తిన నుంచి విజయవాడకు వచ్చిన తర్వాత వారితో చర్చించి ఫైనల్ డెసిషన్ వెల్లడిస్తానని తెలిపారు. దీంతో ఈ వ్యవహారం కూటమిలో ఎలాంటి పరిణామాలకు దారి తీస్తుందనేది ఆసక్తికరంగా మారింది.
కడప జెడ్పీ చైర్మన్ పోస్ట్ ఒక్కటే ఈ వివాదానికి కారణమైనా కూడా, దీని వెనుక కూటమి పార్టీల మధ్య స్థానిక స్థాయిలో ఉన్న రాజకీయ అంచనాలు, హామీలు, సమన్వయ సమస్యలు కూడా చర్చకు వస్తున్నాయి. ఆదినారాయణరెడ్డి నెక్స్ట్ స్టెప్ ఏమిటన్నది తర్వాత ప్రకటనతో క్లారిటీ వచ్చే అవకాశం ఉంది.
