పసిఫిక్ మహాసముద్రంలో కొన్ని నెలలుగా ఉద్భవించిన అత్యంత పవర్ ఫుల్ అయిన సూపర్ ఎల్‌నినో.. భారత్‌తో పాటు దాదాపు 90 దేశాలపై మరింతగా తీవ్ర ప్రభావాన్ని చూపించడానికి సిద్ధమవుతోంది. ఈ వాతావరణ మార్పుల కారణంగా దేశంలో గతంలో ఎప్పుడూ లేని విధంగా మూడు ప్రధాన రకాల విపత్తులు సంభవించే అవకాశముంటుందని నిపుణులు ఆందోళన వ్యక్తం చేస్తున్నారు.
ముఖ్యంగా వర్షాకాలంలో రుతుపవనాల వ్యవస్థ పూర్తిగా దెబ్బతినడం, చలికాలంలో కూడా సాధారణం కంటే ఎక్కువ టెంపరేచర్లు నమోదు కావడం అలాగే వ్యవసాయ రంగం తీవ్రంగా నష్టపోయి ఆహార భద్రత ప్రమాదంలో పడటం వంటి సవాళ్లు ప్రపంచవ్యాప్తంగా ఎదురవుతున్నాయి.
ఈ ఎల్‌నినో విపత్తు వల్ల ఇప్పటికే ఖరీఫ్ సీజన్ పంటలపై ప్రతికూల ప్రభావం పడింది. వర్షాలు టైమ్‌కు కురవకపోవడంతో చాలా చోట్ల పంటలు ఎండిపోయాయి. డిసెంబర్, జనవరి మాసాల్లో సాధారణంగా తీవ్రమైన చలి ఉండాల్సిన సమయం కానీ ఈసారి ఉష్ణోగ్రతలు పెరగనుండటంతో రాబోయే రబీ పంటలు కూడా తీవ్రంగా దెబ్బతినే ప్రమాదం పొంచి ఉంది.
దీనివల్ల దేశంలో బియ్యం, వరి, పప్పుధాన్యాల ఉత్పత్తి దారుణంగా తగ్గిపోయి ఆహార ద్రవ్యోల్బణం పెరిగే అవకాశం ఉంటుంది. మరోవైపు డెంగ్యూ, మలేరియా, చికున్‌గున్యా వంటి సీజనల్ వ్యాధులు విజృంభించే డేంజర్ కూడా ఉందని నిపుణులు హెచ్చరిస్తున్నారు.
ప్రపంచవ్యాప్తంగా కూడా ఈ ఎల్‌నినో పరిస్థితులు చాలా దుష్పరిణామాలకు దారితీస్తున్నాయి. ఐక్యరాజ్యసమితికి చెందిన వరల్డ్ ఫుడ్ ప్రోగ్రామ్ నివేదిక ప్రకారం చూస్తే.. 2027 చివరి నాటికి ప్రపంచవ్యాప్తంగా 45 దేశాలకు చెందిన దాదాపు 27.4 కోట్ల మంది ప్రజలు తీవ్రమైన ఆహార సంక్షోభాన్ని ఎదుర్కోబోతున్నారు. వాతావరణ మార్పులతో పాటు అంతర్జాతీయ పరిణామాలు తోడవడం వల్ల ఎరువుల కొరత ఏర్పడి నిత్యావసరాలు, ఆహార ధాన్యాల ధరలు విపరీతంగా పెరుగుతాయి. మొత్తంగా ఎల్‌నినో సృష్టించే ఈ పరిణామాల వల్ల ఆర్థిక వ్యవస్థలకు పెద్ద సవాలుగా మారబోతున్నాయి.