ఏపీలో త్వరలో జరగనున్న ఎంపీటీసీ, జడ్పీటీసీ ఎన్నికల ఘట్టం ఫైనల్ స్టేజ్‌కు చేరుకుంటోంది. ఆంధ్రప్రదేశ్ వ్యాప్తంగా దాఖలైన నామినేషన్ల స్క్రూటినీని పూర్తి చేసిన అధికారులు, సరైన పేపర్స్‌ సబ్‌మిట్ చేసిన కేండిడేట్స్ తుది వివరాలను వెల్లడించారు. 28 జిల్లాల్లో ఎన్నికల సంఘం చేపట్టిన పరిశీలన తర్వాత స్థానిక సంస్థల సమరంలో ఏ పార్టీ నుంచి ఎంతమంది రేసులో ఉన్నారో అనే దానిపై క్లారిటీ వచ్చింది.
మొత్తం 9,829 ఎంపీటీసీ స్థానాల కోసం వచ్చిన 51వేల902 నామినేషన్లలో 46వేల045 కేండిడేట్స్ అప్లికేషన్లు నిబంధనలకు కట్టుబడి ఉన్నట్లు తేలింది. టెక్నికల్ రీజన్స్‌ వల్ల 5వేల857 నామినేషన్లను ఎన్నికల అధికారులు తిరస్కరించారు. ఎంపీటీసీ బరిలో టీడీపీ తరఫున 19వేల 760 మంది, వైసీపీ నుంచి 17వేల726 మంది, జనసేన నుంచి 4వేల330 మంది, బీజేపీ నుంచి 1 ,049 మంది కేండిడేట్స్ నిలిచారు. వీరితో పాటు 2,012 మంది ఇండిపెండెంట్లు కూడా బరిలో ఉన్నారు.
మరోవైపు 659 జడ్పీటీసీ స్థానాల విషయానికొస్తే.. 5వేల724 నామినేషన్లు రాగా 954 దరఖాస్తులు వేటుకు గురై 4వేల770 నామినేషన్లు ఆమోదం పొందాయి. దీనిలో టీడీపీ నుంచి 1,693, వైసీపీ తరఫున 1,445, జనసేన నుంచి 587, బీజేపీ నుంచి 227 మంది పోటీలో నిలవగా, 227 మంది స్వతంత్రులు బరిలో ఉన్నారు. ఇక జిల్లాల వారీగా తిరుపతి జిల్లాలో ఎక్కువగా 35 జడ్పీటీసీ స్థానాలకు 280 నామినేషన్లు ఆమోదాన్ని సాధించాయి. కడపలో 39 స్థానాలకు 215, విశాఖలో 4 స్థానాలకు 46 నామినేషన్లు కరెక్టుగా ఉన్నట్లు ఎస్ఈసీ స్పష్టం చేసింది.