ఆంధ్రప్రదేశ్‌లో లోకల్ బాడీ ఎన్నికల షెడ్యూల్ విడుదల అయిన వెంటనే కూటమి పార్టీల మధ్య సీట్ల సర్దుబాటు చర్చలు స్పీడందుకున్నాయి. దీనిలో భాగంగానే టీడీపీ, జనసేన నాయకుల మధ్య జరిగిన కీలక భేటీలు ఫలప్రదమయ్యాయని, లోకల్ పోరులో పోటీకి సంబంధించి చర్చలు సఫలమయ్యాయని తాడేపల్లిగూడెం ఎమ్మెల్యే బొలిశెట్టి శ్రీనివాస్ వెల్లడించారు.
అమరావతిలో సీఎం నారా చంద్రబాబుతో జనసేన ముఖ్య నేతల సమావేశం ముగిసిన తర్వాత బొలిశెట్టి మీడియాతో మాట్లాడారు. తమ మధ్య సీట్ల కోసం ఇంటర్నల్ గొడవలు జరుగుతున్నాయనే నెగిటివ్ సంకేతాలకు చెక్ పెట్టే విధంగానే తాము పక్కా ప్లానింగ్‌తో ముందుకు సాగుతున్నామని క్లారిటీ ఇచ్చారు. ప్రతి నాయకుడు, కార్యకర్త మనోభావాలను కూడా గౌరవిస్తూ నిర్ణయాలు తీసుకుంటున్నామని స్పష్టం చేశారు.
లోకల్ బాడీ ఎన్నికల్లో కూటమి విజయమే టార్గెట్‌గా తామంతా సింగిల్ అజెండాతోనే ముందుకు వెళ్తున్నామని ఎమ్మెల్యే బొలిశెట్టి తెలిపారు. మరో రెండు రోజుల్లో టీడీపీ, జనసేన, భారతీయ జనతా పార్టీ కలిసి పోటీ చేసే ఉమ్మడి కేండిడేట్స్ సింగిల్ లిస్ట్‌ను అఫీషియల్‌గా ప్రకటిస్తామని ఆయన చెప్పారు.
కేవలం ఈ లోకల్ పోరు మాత్రమే కాకుండా రాబోయే ప్రతి సార్వత్రిక ఎలక్షన్‌లోనూ కూటమిగా ఒక్కటిగా కలిసే పోటీ చేస్తామని బొలిశెట్టి శ్రీనివాస్ తేల్చి చెప్పారు. ఈ సమావేశం సజావుగా సాగడంపై ముఖ్యమంత్రి చంద్రబాబుకు జనసేన నేతలు ప్రత్యేక ధన్యవాదాలు తెలియజేశారు. మొత్తంగా ఈ నిర్ణయంతో కూటమి శ్రేణుల్లో ఉత్సాహం మరింత పెరిగింది.