సీనియర్ ఐఏఎస్ అధికారిణి ఆమ్రపాలి క్యాడర్ కేటాయింపు వివాదం మరోసారి చర్చనీయాంశంగా మారింది. ఆమె ఆంధ్రప్రదేశ్‌లో పనిచేయాలా, తెలంగాణలోనే కొనసాగాలా అనే ప్రశ్నకు తెలంగాణ హైకోర్టు తీర్పుతో స్పష్టత వచ్చే అవకాశం ఉంది. తాజాగా ఆమ్రపాలి దాఖలు చేసిన పిటిషన్‌పై విచారణ పూర్తికాగా, ఇరువర్గాల వాదనలు విన్న ధర్మాసనం తీర్పును రిజర్వ్‌లో ఉంచింది.
రాష్ట్ర విభజన సమయంలో కేంద్ర ప్రభుత్వం ఆమ్రపాలిని ఆంధ్రప్రదేశ్ క్యాడర్‌కు కేటాయించింది. ఈ నిర్ణయాన్ని సవాలు చేస్తూ ఆమె కేంద్ర పరిపాలనా ట్రిబ్యునల్‌ (క్యాట్‌)ను ఆశ్రయించారు. అక్కడ ఆమెకు అనుకూలంగా తెలంగాణ క్యాడర్‌కు కేటాయించేలా ఉత్తర్వులు వెలువడ్డాయి. అయితే, క్యాట్‌ ఆదేశాలపై తెలంగాణ హైకోర్టు గతంలో స్టే విధించింది.
తాజా విచారణలో ఇరువర్గాల న్యాయవాదులు తమ వాదనలు వినిపించారు. కోర్టు తుది తీర్పు వెల్లడించాల్సి ఉంది. ఆ తీర్పు వెలువడిన తర్వాత ఆమ్రపాలి క్యాడర్ కేటాయింపు, ఆమె భవిష్యత్తు పోస్టింగ్‌పై స్పష్టత వచ్చే అవకాశం ఉంది. అప్పటివరకు ఆమె ఏ రాష్ట్రంలో కొనసాగుతారనే అంశంపై ఉత్కంఠ కొనసాగనుంది.