ఏపీలో వేడెక్కిన స్థానిక సంస్థల ఎన్నికల సమయంలో అనంతపురం జిల్లాలో ఏకగ్రీవాలు జోరందుకున్నాయి. ముఖ్యంగా గుంతకల్లు నియోజకవర్గంలో అధికార కూటమి కేండిడేట్స్ ఏకపక్ష ఆధిపత్యాన్ని ప్రదర్శిస్తూ విజయదుందుభి మోగించారు. స్థానిక ఎమ్మెల్యే గుమ్మనూరు జయరాం వ్యూహాత్మక ఆధ్వర్యంలో టీడీపీ, కూటమి వర్గాలు గుంతకల్లు ప్రాంతాన్ని కంప్లీట్‌గా క్లీన్ స్వీప్ చేశాయి.
ఇప్పటికే గుత్తి మున్సిపాలిటీకి సంబంధించి చైర్మన్ పదవితో సహా ఏకంగా 27 వార్డు స్థానాలు ఏకగ్రీవం అయ్యాయి. తాజాగా అదే జోరును జెడ్పీటీసీ, ఎంపీటీసీ ఎన్నికల్లోనూ కంటిన్యూ చేశారు. గుత్తి, గుంతకల్లు, పామిడి మండలాల పరిధిలోని అన్ని ఎంపీటీసీ, జడ్పీటీసీ స్థానాలను వందకు వంద శాతం కూటమి తమ అకౌంట్లో వేసుకుంది. గుత్తి జడ్పీటీసీగా నల్లబోతుల స్వాతి, గుంతకల్లు జడ్పీటీసీగా డి. గీత, అలాగే పామిడి జడ్పీటీసీగా పల్లె శ్రీనివాసులు ఎన్నికైనట్లు అఫీషియల్‌ ప్రకటన వెలువడింది.
ఈ మేరకు ఎన్నికల రిటర్నింగ్ అధికారి , జడ్పీ సీఈఓ విజయలక్ష్మి వారికి విజయ ధ్రువీకరణ పత్రాలు అందజేశారు. ఉమ్మడి అనంతపురం జిల్లా విడిపోయిన తర్వాత జరిగిన ఈ స్థానిక సమరంలో, ఒకేసారి మూడు జడ్పీటీసీ స్థానాలు కూడా ఎలాంటి పోటీ లేకుండా ఏకగ్రీవంగా ఎన్నిక కావడం ఇదే మొదటిసారి అని అధికారులు వెల్లడించారు. ఈ ఘనవిజయంతో కూటమి శ్రేణుల్లో మరింత ఉత్సాహం వ్యక్తమవుతోంది.