ఏపీలోని కడప జిల్లా రాజకీయాల్లో ఒక్కసారిగా వాతావరణం రోజురోజుకు హీటెక్కుతుంది. స్థానిక సంస్థల ఎంపీటీసీ, జడ్పీటీసీ ఎన్నికలపై సస్పెన్స్ కొనసాగుతున్న కీలక సమయంలో, వైసీపీ (YSRCP) ఎంపీ వైఎస్ అవినాష్‌రెడ్డితో పాటు కొంతమంది ఆ పార్టీ అగ్రనేతలను పోలీసులు తమ అదుపులోకి తీసుకోవడం ఏపీ వ్యాప్తంగా తీవ్ర కలకలం రేపింది.
కడప నగరంలోని వైసీపీ జిల్లా ఆఫీసు వద్ద ఉన్న ఎంపీ అవినాష్‌రెడ్డి, మాజీ మంత్రి అంజాద్ బాషా, మాజీ ఎమ్మెల్యే రవీంద్రనాథ్‌రెడ్డి, మాజీ మేయర్ పాకా సురేశ్‌ను పోలీసులు అకస్మాత్తుగా అదుపులోకి తీసుకున్నారు. తర్వాత వారిని భారీ భద్రత మధ్య పులివెందులకు తీసుకువెళ్లి, అవినాష్‌రెడ్డిని ఆయన నివాసంలోనే హౌస్ అరెస్ట్ చేశారు.
అక్టోబర్ 21 వ తేదీ బుధవారం నామినేషన్లు వేసే సమయంలో చోటు చేసుకున్న దాడి ఘటనలతో కడప పరిసర ప్రాంతాల్లో వాతావరణం ఉద్రిక్తంగా మారింది. ఇలాంటి పరిస్థితుల్లో అక్కడ అవాంఛనీయ సంఘటనలు జరగకుండా, లా అండ్ ఆర్డర్‌ను కాపాడటానికి ముందు జాగ్రత్త చర్యల్లో భాగంగానే వీరిని అదుపులోకి తీసుకున్నట్లు పోలీస్ ఉన్నతాధికారులు వెల్లడించారు.
ఎలక్షన్ ప్రాసెస్ అంతా కూడా ప్రశాంత వాతావరణంలో ముగిసే వరకు కడప జిల్లా వ్యాప్తంగా కట్టుదిట్టమైన పోలీస్ బందోబస్తును ఇలాగే కొనసాగిస్తామని అధికారులు స్పష్టం చేశారు. దీంతో కడప రాజకీయ సర్కిల్స్‌లో ఈ హౌస్ అరెస్టుల డ్రామా హాట్ టాపిక్‌గా మారింది.