టీడీపీ సీనియర్ నేత, మాజీ మంత్రి యనమల రామకృష్ణుడు ఈరోజు అంటే అక్టోబర్ 22న అస్వస్థతకు గురి కావడం పార్టీ వర్గాల్లో తీవ్ర ఆందోళన రేకెత్తించింది. ఆయన ఆరోగ్య పరిస్థితి క్షీణించడంతో కుటుంబసభ్యులు వెంటనే కాకినాడలోని ఫేమస్ ట్రస్ట్ హాస్పిటల్‌కి తరలించారు. ప్రస్తుతం ఆయనకు ప్రత్యేక వైద్య నిపుణుల బృందం పర్యవేక్షణలో అత్యవసర చికిత్సను అందిస్తున్నారు.
యనమల అనారోగ్యం పాలయ్యారనే న్యూస్ తెలిసిన వెంటనే ముఖ్యమంత్రి చంద్రబాబు నాయుడు వెంటనే స్పందించారు. యనమల కుటుంబసభ్యులతో పాటు ఆయనకు ట్రీట్మెంట్ అందిస్తున్న డాక్టర్లతో ఫోన్‌లో మాట్లాడి,ఆయన ఆరోగ్య పరిస్థితిని, అందిస్తున్న వైద్య సేవల వివరాలను అడిగి తెలుసుకున్నారు.
అంతేకాదు మాజీ మంత్రి యనమల ఆరోగ్య పరిస్థితిని సమీక్షిస్తూ, ఎప్పటికప్పుడు తనకు అప్‌డేట్స్ ఇవ్వాలని పార్టీ ముఖ్య నేతలను సీఎం ఆదేశించారు. ముఖ్యమంత్రి చంద్రబాబు ఆదేశాలతో టీడీపీ ఎంపీ సానా సతీశ్ కాకినాడలోని ఆస్పత్రికి చేరుకున్నారు.
అక్కడ యనమల ఆరోగ్య పరిస్థితిని, వైద్యులు అందిస్తున్న ట్రీట్మెంట్‌ను సానా సతీశ్ దగ్గరుండి పర్యవేక్షిస్తున్నారు. ప్రస్తుతం యనమల ఆరోగ్యం నిలకడగా, స్థిరంగా ఉందనే సమాచారంతో పార్టీ శ్రేణులు ఊపిరి పీల్చుకున్నాయి.