రాజేష్ ఖ‌న్నాలా ఉండేవాడు.. అమీర్ ఖాన్‌లా సిగ్గుప‌డేవాడు.. అలాంటిది ఒక్కసారే ర‌ణ‌వీర్ సింగ్ అయిపోయాడు. దురంధ‌ర్ లెవెల్లో ఎలివేష‌న్ ఇవ్వాల‌ని ఫిక్స్ అయిపోయిన‌ట్లున్నాడు. అందుకే పైకి ఏ క‌వ‌రింగ్ చేసుకున్నా.. రాబోయే ఎన్నిక‌ల ర‌ణ‌రంగం కోసం గెట‌ప్ మార్చే ప‌నిలో కేటీఆర్ ప‌డ్డారనేది అర్ధ‌మైపోతుంది. ఎందుకంటే దీని వెన‌క ఓ క‌థ ఉంది. దాని కోసం కొంచెం ఫ్లాష్ బ్యాక్ కి వెళ‌దాం.
మామూలుగా తెలంగాణ హైద‌రాబాద్ నుంచి పైన ఉత్త‌ర తెలంగాణ వ‌ర‌కు కొంచెం నార్త్ క‌ల్చ‌ర్ అల‌వాటు అవుతుంది. అందుకే ఎక్కువ‌మంది క్లీన్ షేవ్ ఇష్ట‌ప‌డ‌తారు. నార్త్ ఇండియ‌న్స్ లాగా గెడ్డం పెంచకుండా మీసం తీసేసి ఉంటారు. అలాగే కేటీఆర్.. క‌ల్వ‌కుంట్ల తార‌క రామారావు కూడా. ఉద్య‌మం జ‌రిగే స‌మ‌యంలో అమెరికా నుంచి వ‌చ్చేసి రంగంలోకి దిగారు. అప్ప‌టికే కేసీఆర్ దూకుడు మీదుంటే.. హ‌రీష్ రావు నెంబ‌ర్ టు గా ఉన్నారు. కేటీఆర్ రావ‌డం.. అప్ప‌టికే క‌విత ఎంట్రీ ఇవ్వ‌డంతో ఉద్య‌మానికి కేసీఆర్ వార‌సుల క‌ల‌రింగ్ వ‌చ్చింది.
ఉద్య‌మం అయిపోయి.. తెలంగాణ వ‌చ్చాక.. అధికారంలోకి రావ‌డంతో ఆ క‌ల‌ర్ మ‌రింత గూలాబీమ‌య‌మైపోయింది. కేటీఆర్ మంత్రి కావ‌డం… క‌విత ఎంపీ కావ‌డం చూశాం. కేటీఆర్ ఎడ్యుకేటెడ్ అండ్ బిజినెస్ మైండ్ కావ‌డం.. అలాగే తండ్రి లాగే టాకింగ్ ప‌వ‌ర్ మ‌స్తుగా ఉండటంతో.. ప‌వ‌ర్‌లో చెల‌రేగిపోయారు. బిజినెస్ స‌ర్కిల్స్‌లో గ‌ట్టిగా పాగా వేసేశారు. ఇక ఐటీ మంత్రిగా విదేశాల్లోనూ చ‌క్రం తిప్పేశారు. పైగా ప‌దేళ్ల పాటు అధికారంలో ఉండటంతో గ‌ట్టిగానే సెటిలైపోయారు.
రెండో సారి అధికారంలోకి వ‌చ్చాక కేటీఆర్ దాదాపు కేసీఆర్‌కు ప్ర‌త్యామ్నాయంగా క‌న‌ప‌డ్డారు. వ‌ర్కింగ్ ప్రెసిడెంట్ ప‌ద‌వి ఇవ్వ‌డంతో వార‌సుడిగా క‌న్ఫమ్ అయిపోయారు. మూడోసారి కూడా గెలుస్తాం.. ఈసారి కేటీఆర్ సీఎం అని ఆయ‌న వ‌ర్గం గ‌ట్టిగా ఫీలైంది. కాని వీరి ఆశ‌ల‌కు రేవంత్ రెడ్డి గండి కొట్టారు. అంచ‌నాల‌ను త‌ల‌కిందులు చేస్తూ కాంగ్రెస్ అధికారంలోకి వ‌చ్చింది. అదే కేటీఆర్‌కు కూడా క‌లిసొచ్చింది. అవును ప్ర‌తిప‌క్షంలో ఉండ‌టం వ‌ల్లే ప‌వ‌ర్ ముసుగులు పోయి… జ‌నంలోకి రావ‌డం మొద‌లెట్టారు. మాట తీరులో స్ట‌యిల్ పోయి.. మాస్ వ‌చ్చేసింది. కేసులు వ‌రుస‌గా భ‌య‌పెడుతున్నా ఎదురుదాడి చేస్తూ కేటీఆర్ ఎక్క‌డా వెన‌క్కి త‌గ్గ‌లేదు.
పోను పోను రేవంత్ ప్ర‌భుత్వంపై అసంతృప్తి పెరుగుతుండ‌టం.. అది వ్య‌తిరేక‌త దిశ‌గా వెళుతుండ‌టంతో కేటీఆర్ దూకుడు పెంచారు. మ‌రోవైపు క‌విత బ‌య‌ట‌కు వెళ్లి ఎన్ని బండ‌లేసినా పెద్ద ఎఫెక్ట్ ప‌డ‌లేదు. పైగా హ‌రీష్ రావును టార్గెట్ చేయ‌డంతో కేటీఆర్‌కి బీఆర్ఎస్‌లో ఎదురు లేకుండా పోయింది. కేసీఆర్ ఉన్నా ఇమేజ్ లాగా మాత్ర‌మే.. యాక్టివ్ గా తిర‌గ‌లేని ప‌రిస్దితి. కేసీఆర్ బ్రెయిన్ వాడుకుంటూ కేటీఆర్ క‌థ న‌డిపిస్తార‌ని అర్ధ‌మైపోయింది.
అయితే రేవంత్, కేటీఆర్‌ల మ‌ధ్య మాట‌ల యుద్ధం మ‌నం చూస్తూనే ఉన్నాం. అందులో రేవంత్ రెడ్డి ఊర మాస్ డైలాగులు వేసేస్తారు. గ‌త ఎన్నిక‌ల స‌మ‌యంలోనే రేవంత్ రెడ్డి కేటీఆర్ క్లీన్ షేవ్ మీద కామెంట్లు చేశారు. రేవంత్ రెడ్డి ఎప్పుడూ గ‌డ్డంతోను, మెలితిప్పిన మీసాల‌తోనూ ఉంటారు. దీంతో ఛాలెంజులు చేసేట‌ప్పుడు వాటిని వాడుతూ ఉంటారు. ఆ అవ‌కాశం కేటీఆర్ కి లేకుండా పోయింది.
ఇప్పుడు రాబోయే ఎన్నిక‌ల కోసం రెండేళ్ల ముందే కేటీఆర్ బాగా ప్రిపేర్ అయిపోతున్నారు. ఇప్ప‌టికే యుద్ధం జ‌రుగుతున్న ఫీలింగ్ మ‌న‌కొస్తుంది. గ‌తంలో కేటీఆర్ పై కేవ‌లం అమెరికా నుంచి అధికారం కొట్టేశాడు. అధికారంలో పెత్త‌నం చేసి.. అవినీతితో బాగా సంపాదించారనే ఆరోప‌ణ‌లు గ‌ట్టిగా ఉన్నాయి. ఇప్ప‌టికీ అవే కాంగ్రెస్ వాడుతుంటోంది. అందుకే ఆ ఇమేజ్ బ్రేక్ చేయ‌డానికి కేటీఆర్ క్లాస్ టు మాస్ మారిపోతున్నార‌ని తెలుస్తోంది. ఇక నిత్యం జ‌నంలో ఉండాలి.. అలాగే అవ‌స‌ర‌మైతే పాద‌యాత్ర చేయాల‌ని కూడా ప్లాన్ ఉంది. అందుకే గెట‌ప్ మారుస్తున్నార‌ని స‌మాచారం.
నోటి దాకా వ‌చ్చిన సీఎం పోస్టు 2023లో పోయింది. అందుకే ఈసారి మీసం మెలేసి మ‌రీ ఛాలెంజ్ చేసి సీఎం అవ్వాల‌ని గ‌ట్టిగా స్ట్రాట‌జీలు వ‌ర్క‌వుట్ చేస్తున్నారు. ప‌రిస్ధితులు కూడా కాస్త అనుకూలంగానే క‌న‌ప‌డుతున్నాయి. కేంద్రంలో బీజెపీ వీక్ అయి.. కాంగ్రెస్ బ‌ల‌ప‌డితే.. ఆ ఎఫెక్ట్ తెలంగాణ‌పై ప‌డితే.. కాస్త మార్పు ఉండొచ్చు.. లేదంటే కేటీఆర్ సీఎం కావ‌డానికి పుష్క‌లంగా అవ‌కాశాలు క‌న‌ప‌డుతున్నాయి. మ‌రిక లేటెందుకు గులాబీ రాజా మీసం మెలేయ్ .