ఆంధ్రప్రదేశ్‌లో రాష్ట్ర ఎన్నికల సంఘం (SEC) తొలి విడత గ్రామ పంచాయతీ ఎలక్షన్స్ కోసం నవంబర్ 13న అధికారికంగా నోటిఫికేషన్ జారీ చేయడంతో, ఏపీ గ్రామీణ ప్రాంతాల్లో రాజకీయ వేడి ఒక్కసారిగా పీక్స్‌కు చేరింది. ఇన్నాళ్లూ సర్పంచ్ సీటుపై కన్నేసి కాచుకుని కూర్చున్న ఆశావహులతో పాటు.. వార్డు మెంబర్‌గా గెలవాలని భావిస్తున్న యువ నాయకులు అప్పుడే గ్రౌండ్ లెవెల్‌లో పావులు కదపడం మొదలుపెట్టారు.
ఈ నామినేషన్ల పర్వం నవంబర్ 15వ తేదీ ఉదయం నుంచి ప్రారంభమై నవంబర్ 17వ తేదీ సాయంత్రం 5 గంటల వరకు కొనసాగుతుంది. దాఖలైన నామినేషన్ పత్రాలను అధికారులు నవంబర్ 18వ తేదీన క్షుణ్ణంగా పరిశీలిస్తారు.
ఒకవేళ ఏవైనా టెక్నికల్ కారణాలతో నామినేషన్ రిజెక్ట్ అయితే, దానికి సంబంధించి అప్పీల్ చేసుకోవడానికి నవంబర్ 19, 20 తేదీల్లో వెసులుబాటు కల్పించారు. ఆ తర్వాత నామినేషన్ల వెనక్కి తీసుకోవడానికి (విత్‌డ్రా) నవంబర్ 21 ఆఖరి తేదీగా నిర్ణయించారు. అదే రోజు సాయంత్రానికల్లా బరిలో నిలిచే కేండిడేట్స్ ఫైనల్ లిస్ట్ బయటకొస్తుంది.
అసలైన పోలింగ్ యుద్ధం నవంబర్ 26వ తేదీన జరగనుంది. ప్రశాంత వాతావరణంలో ఓటింగ్ పూర్తి చేసిన వెంటనే, అదే రోజు మధ్యాహ్నం 2 గంటల నుంచి కౌంటింగ్ ప్రక్రియను మొదలుపెడతారు. లెక్కింపు పూర్తయిన వెంటనే విజేతలు ఎవరో తేల్చి డిక్లేర్ చేస్తారు. ఏదైనా కేంద్రంలో అల్లర్లు లేదా టెక్నికల్ లోపాలతో ఓటింగ్ ఆగిపోతే, నవంబర్ 27వ తేదీన రీపోలింగ్ జరిపేలా పక్కా ప్లాన్ సిద్ధం చేశారు.
పంచాయతీ ఎలక్షన్స్ కోసం.. షెడ్యూల్ వచ్చేయడంతో ఊళ్లలో పొలిటికల్ ఈక్వేషన్స్ గంటకో రకంగా మారుతున్నాయి. ఊరి పెద్దలతో భేటీలు, ఏకగ్రీవాల కోసం రాయబారాలు, ఓటర్ల చుట్టూ తిరగడం వంటి వ్యూహాలతో ఉదయం నుంచి గ్రామాలు కళకళలాడుతున్నాయి. ఎన్నికల ఖర్చు, పర్సనల్ ఇమేజ్, లోకల్ సమస్యలే అజెండాగా ఈ పంచాయతీ పోరు నడవనుంది. మొత్తానికి నవంబర్ 15వ తేదీన నామినేషన్లు పడటంతో పల్లెల్లో రచ్చ మరింత పెరగడం గ్యారంటీగా కనిపిస్తోంది.