బుల్లితెరపై యాక్టర్ జగపతి బాబు హోస్ట్‌గా ఎంటర్‌టైన్ చేస్తున్న జయమ్ము నిశ్చయమ్మురా.. టాక్ షో విజయవంతంగా రెండో సీజన్‌లోకి అడుగుపెట్టిన సంగతి తెలిసిందే. సరికొత్త కాన్సెప్ట్‌తో వస్తున్న టాక్ షోకి రీసెంట్‌గా ఏపీ విద్యా, ఐటీ శాఖల మంత్రి నారా లోకేష్ గెస్ట్‌గా హాజరయ్యారు. దీనికి సంబంధించిన లేటెస్ట్ ప్రోమోను రిలీజ్ చేయగా.. అది ఓ రేంజ్‌లో వైరల్ అవుతోంది.
ఈ ప్రోమోలో సరికొత్త జోష్‌తో కనిపించిన నారా లోకేష్ ..స్టేజ్ మీదికి రాగానే జై బాలయ్య అంటూ గట్టిగా నినాదం చేసి సందడి చేశారు. చిన్నతనంలో స్కూల్‌లో అందరికంటే కూడా ఎక్కువగా దెబ్బలు తిన్నాది తానొక్కడినేనంటూ ఆనాటి జ్ఞాపకాలను గుర్తు చేసుకున్నారు. అంతేకాకుండా హీరో బాలకృష్ణ కేవలం ఒక్కరికి మాత్రమే భయపడతారనే సీక్రెట్ ఒకటి బయటపెట్టి అందరినీ ఆశ్చర్యపరిచారు. ఇక షో ఎండింగ్‌లో ఫ్లూటు జింక ముందు ఊదు, సింహం ముందు కాదంటూ బాలయ్య మాస్ డైలాగ్‌ను తనదైన స్టైల్‌ లో చెప్పి ఆకట్టుకున్నారు.
బిజీ షెడ్యూల్ మధ్య నారా లోకేష్‌లోని ఈ సరదా కోణాన్ని చూసి ఆయన ఫ్యాన్స్, పార్టీ కార్యకర్తలు ఖుషీ అవుతున్నారు. ఈ ఎపిసోడ్‌లో లోకేష్ ఇంకా ఎలాంటి ఆసక్తికర విషయాలను పంచుకున్నారో తెలుసుకోవడానికి ఈగర్‌గా వెయిట్ చేస్తున్నారు. ఈ ప్రత్యేక ఎపిసోడ్ ప్రసార వివరాలు చూస్తే.. నవంబర్ 6వ తేదీ నుంచి ఓటీటీ ప్లాట్‌ఫామ్ జీ5 (ZEE5)లో స్ట్రీమింగ్ కానుంది. అలాగే బుల్లితెరపై నవంబర్ 8న ఆదివారం రాత్రి 7.30 గంటలకు ‘జీ తెలుగు’ ఛానల్‌లో ఇది టెలికాస్ట్ కానుంది.