స్థానిక సంస్థల ఎన్నికల నామినేషన్ల తొలిరోజే అంటే అక్టోబర్ 16 శుక్రవారం రోజే రాయలసీమ రాజకీయాలు ఒక్కసారిగా భగ్గుమన్నాయి. చిత్తూరు జిల్లా పుంగనూరులో చెలరేగిన హింసాకాండతో.. ఏపీ పాలిటిక్స్ ఒక్కసారిగా హీటెక్కాయి.
రాజంపేట ఎంపీ మిథున్ రెడ్డి కాన్వాయ్ నామినేషన్ కేంద్రం వద్దకు చేరుకున్న సమయంలో తీవ్ర ఉద్రిక్తత చోటు చేసుకుంది. పోలీసుల పెట్టిన రూల్స్‌ను లెక్కచేయకుండా వాహనాలతో గేట్లను ఢీకొట్టి బలవంతంగా లోపలికి దూసుకెళ్లడంతోనే అసలు రచ్చ మొదలైనట్లు తేలింది.
పుంగనూరు ఘటనపై కర్నూలు రేంజ్ డీఐజీ కోయ ప్రవీణ్ తాజాగా మీడియాతో మాట్లాడుతూ.. సంచలన విషయాలను బయటపెట్టారు. ఎంపీ కాన్వాయ్‌లోని కార్లలో కొంతమంది రౌడీషీటర్లు మారణాయుధాలతో తిరుగుతూ వీరంగం సృష్టించారని ఆయన వివరించారు. వైసీపీ, టీడీపీ వర్గాల రాళ్లదాడి, ఘర్షణలతో పరిస్థితి పూర్తిగా చేయి దాటిపోవడంతో.. డీఎస్పీ ప్రసాద్ గాల్లోకి మూడు రౌండ్లు కాల్పులు జరపాల్సి వచ్చిందని వెల్లడించారు.
అక్కడ పరిస్థితులు ఉద్రిక్తంగా మారడంతో ఎస్పీ ధీరజ్ స్వయంగా రంగంలోకి దిగి ఎంపీ మిథున్ రెడ్డిని సురక్షితంగా అక్కడి నుంచి పంపించినట్లు చెప్పారు. బాధితుల ఫిర్యాదులతో ఇప్పటికే మూడు కేసులు నమోదు చేసి, దర్యాప్తు వేగవంతం చేసినట్లు డీఐజీ తెలిపారు.ఈ ఘటనలో13మందికి గాయాలవడంతో పాటు చాలా వాహనాలు ధ్వంసమయ్యాయని వివరించారు.